«Рексхэм» директорлар кеңесін кеңейтті — төрт жаңа мүше қосылды

«Рексхэм» футбол клубы директорлар кеңесінің кеңейтілгенін ресми түрде хабарлады. Ағылшын футбол лигасының мақұлдауынан кейін Каролина Хатчинсон, Тейер Джойс, Джордж Дьюи және Рики Энгельберг кеңес құрамына енді.

Клубтың иелері Роб Макэлхенни мен Райан Рейнольдс бұл тұлғалардың «Рексхэм» үшін бұрыннан бері еңбек етіп келе жатқанын атап өтті:

«Бұл адамдар клуб пен қала үшін жаңа есімдер емес. Олар біздің алаңдағы және алаңнан тыс жетістіктерімізді жақсарту үшін қазірдің өзінде қажырлы еңбек етуде», — делінген мәлімдемеде.

Жаңа директорлар туралы:

• Джордж Дьюи — «Рексхэмге қош келдіңіз» деректі сериалының атқарушы продюсері, сондай-ақ Райан Рейнольдспен бірге Maximum Effort компаниясының негізін қалаған.
• Рики Энгельберг — бұрын клуб демеушісі VistaPrint-тің маркетинг директоры болған.
• Каролина Хатчинсон мен Тейер Джойс — Роб Макэлхеннидің More Better Industries компаниясында жұмыс істеген.

Қазіргі таңда «Рексхэм» 1-лигада екінші орын алып тұр. Команда келесі матчында сенбі күні өз алаңында «Бертон Альбионмен» кездеседі.

Біздің парақшамыздан футбол матчтарының барлық нәтижелерін Live форматта бірінші болып біліңіз!