«Реал Сосьедад» гол соғады, бірақ мадридтіктер жеңіске жетеді – комментатор Испания Кубогы матчы жайлы

Сәуірдің 1-нен 2-не қараған түні аты аңызға айналған «Сантьяго Бернабеу» стадионында мадридтік «Реал» Испания Кубогының жартылай финалының жауапты матчында «Реал Сосьедадты» қабылдайды. Қос команда арасындағы бірінші кездесу «корольдік клубтың» жеңісімен аяқталған – 1:0, алайда басктер лайықты қарсылас екенін көрсете білді.

«Реал» артықшылығын пайдаланып, ақтық сынға өте ала ма, әлде «ақ-көктер» сенсация жасап, жүлде жолындағы интриганы қайта жандандыра ма?

Sport Plus Qazaqstan телеарнасының бас редакторы, комментатор Айбек Қабылша Sport Pulse порталына алдағы матчқа қатысты пікір айтты:

«Реал Мадридті» алда өте маңызды кездесулер күтіп тұр. Дегенмен, команда осы маусымда трофей жеңіп алу мүмкіндігіне ие – олар қазірдің өзінде жартылай финалға шықты. Оның үстіне, алғашқы матчта жеңіске жетті. Сондықтан бұл ойында «Реал Мадрид» сөзсіз фаворит.

«Реал Сосьедад» өз алаңында ұтылғаннан кейін жағдайды түзеуге тырысады. Бірақ менің ойымша, олар бірден шабуылға шықпайды. Себебі «Реалдың» қарымта шабуылдары өте қауіпті екенін жақсы біледі. Сол себепті олар сақ ойнап, ыңғайлы сәтті күтетіні анық. Қорытынды есепте бір ғана доп айырмашылығы бар, сондықтан олар ойын соңына қарай таразы басын теңестіруге тырысуы мүмкін. Бірақ алдымен олар қорғанысты мықтап бекітіп, қақпаға гол жібермеуге көңіл бөледі.

«Реалдың» қақпасын бұл кездесуде Тибо Куртуа емес, Андрей Лунин қорғайды. Сондай-ақ, Карло Анчелотти құрамда бірнеше өзгерістер жасауы мүмкін. Жарақатынан айыққан Давид Алаба алаңға шығуы ықтимал. Бұл қорғаныстағы қателіктерге себеп болуы мүмкін және «Реалдың» гол өткізіп алу ықтималдығын арттырады.

Сондықтан менің ойымша, «Реал Сосьедад» бір гол соғады, бірақ «Реал Мадрид» сенімді түрде жеңіске жетеді – кемінде 3:1 есебімен».

Матч туралы негізгі ақпарат:

Күні: 2 сәуір

Уақыты: 00:30 (тікелей эфир 00:25-тен басталады)

Стадион: «Сантьяго Бернабеу», Мадрид

Көрсетілім: SPORT+ QAZAQSTAN

Біздің парақшамыздан футбол матчтарының барлық нәтижелерін Live форматта бірінші болып біліңіз!