Рай Сейтжанов екі жылдық үзілістен кейін рингке оралады

BoxRec.com мәліметінше, жеңілмеген қазақстандық боксшы Рай Сейтжанов (11-0, 7 КО) ұзақ үзілістен кейін рингке оралуға жақын. Ол 13 желтоқсанда Мәскеуде өтетін бокс кешінде өнер көрсетеді.

Сейтжановтың қарсыласы кәсіби рингте жеңіліс көрмеген ресейлік Вадим Мұсаев (10-0, 6 КО). Бұл бірінші жартылай орта салмақтағы сегіз раундтық жекпе-жек болмақ.

Сейтжанов соңғы рет рингке 2022 жылдың қарашасында шыққан. Алматыда ол тәжік боксшысы Акбарджон Назаровты (0-1) екінші раундта техникалық нокаутпен жеңген. Ал Мұсаев соңғы жекпе-жегін 2024 жылдың 8 тамызында Уфада өткізіп, намибиялық Паулус Амавиланы (10-2-1, 5 КО) төртінші раундта нокаутқа жіберген.

Алдағы жекпе-жек ерекше қызықты болады деп күтілуде, себебі екі боксшы да кәсіби рингте жеңіліссіз келе жатыр.