Рафинья мен «Барселона» жаңа келісімшарт бойынша келісімге келе алмай жатыр

Diario Sport мәліметінше, «Барселона» мен Рафинья жаңа келісімшарт талаптары бойынша ортақ мәмілеге келе алмай отыр. Тараптар негізгі шарттарда елеулі келіспеушіліктерге тап болған.

28 жастағы бразилиялық футболшының қазіргі келісімшарты 2027 жылға дейін жарамды. Алайда клуб қазірдің өзінде ынтымақтастықты жаңа шарттармен жалғастыруды көздеп отыр.

«Барселона» бір жылдық келісімшарт ұсынып, тағы бір маусымға ұзарту мүмкіндігін қарастыруда — клуб ұзақ мерзімді әрі жоғары жалақылы келісімдерден бас тартуға ниетті. Ал Рафинья екі жылдық тұрақты келісімшарт пен жалақының айтарлықтай өсуін талап етіп отыр.

Тараптар келісімге келген жалғыз мәселе — трансферлік құны. Бразилиялық футболшының бағасы шамамен 80 миллион еуро көлемінде белгіленген.

Айта кетейік, биылғы маусымда Рафинья Ла Лигада 31 матч өткізіп, 15 гол соғып, 9 нәтижелі пас беріп, керемет көрсеткішке қол жеткізді.

Біздің парақшамыздан футбол матчтарының барлық нәтижелерін Live форматта бірінші болып біліңіз!