Қазақстандық маман УЕФА Конференция лигасы іріктеу матчына делегат болып тағайындалды

Қазақстандық футбол функционері Аян Әлжанов УЕФА Конференция лигасының екінші іріктеу кезеңіндегі матчқа делегат ретінде қатысады. Ол Арменияның «Арарат-Армения» және Румынияның «Университатя Клуж» клубтары арасындағы кездесуде УЕФА атынан ресми өкіл болады.

Ойын 24 шілде күні Армения астанасындағы «Ереван футбол академиясы» стадионында өтеді. Матчтың басталуы Астана уақытымен 21:00-ге жоспарланған.

Айта кетейік, УЕФА матчтық делегаты — Еуропа футбол қауымдастықтары одағының ресми өкілі. Ол ойын алдындағы ұйымдастырушылық жиындарға жетекшілік етеді, стадионның инфрақұрылымдық және спорттық дайындығын тексереді, сондай-ақ қауіпсіздік пен регламент талаптарының сақталуын қадағалап, матч қорытындысы бойынша есеп тапсырады.