Қазақстандық дзюдошы әлем чемпионатының финалына алғаш рет шықты

Әбиба Әбужақынова Будапештте өткен дзюдодан әлем чемпионатында күміс жүлдегер атанды — бұл Қазақстан әйелдер дзюдосы тарихындағы алғашқы осындай жетістік.

48 келі салмақ дәрежесіндегі финалдық белдесуде қазақстандық спортшы италиялық Ассунта Скуттодан жеңілді — қарсыласы иппонмен жеңіске жетті.

Әбиба Әбужақынова үшін бұл әлемдік біріншіліктердегі алғашқы финал болды — бұған дейін оның қоржынында екі қола медаль болған. Ал Скутто бұған дейін әлем чемпионаттарында бір күміс және екі қола медаль иеленген.

Қазақстандық спортшының финалға шығуы тарихи оқиға болды — еліміздің өкілі алғаш рет әйелдер арасындағы дзюдодан әлем чемпионатының шешуші кездесуіне жетті.