Қазақстанда легионерлерді бюджет есебінен қаржыландыруға тыйым салынды

Қазақстанда «Дене шынықтыру және спорт туралы» жаңартылған заң күшіне енді. Құжат саланы қаржыландыру жүйесіне бірқатар түбегейлі өзгерістер енгізеді.

Басты жаңалық – мемлекеттік бюджет есебінен шетелдік спортшылардың (легионерлердің) еңбекақысын төлеуге тыйым салу. Енді барлық мемлекеттік қаржы тек қазақстандық спортшыларды қолдауға және басым спорт түрлерін дамытуға бағытталады.

Сондай-ақ заңда мынадай өзгерістер қарастырылған:

• командалық спорт түрлеріндегі клубтарды ұстауға лимит енгізу;
• 60-тан астам басым спорт түрінің тізімі бекітілді;
• спорт ұйымдарының басшыларын міндетті түрде ауыстырып отыру (ротация).

Бұл шешім мемлекет шығындарының тиімділігін талдау нәтижесінде қабылданды: бүгінде қаржылай қолдау 180-нен астам спорт түріне көрсетілсе де, тұрақты халықаралық нәтиже тек 14 жазғы және 5 қысқы олимпиадалық спорт түрінен байқалады.

Жаңа шаралар бюджетті оңтайландыруға, ішкі резервті ынталандыруға және қазақстандық спорттың тұрақты даму жүйесін құруға бағытталған.