Қазақстан құрамасының бұрынғы бапкері жаңа қызметке тағайындалды

Футболдан Қазақстан құрамасы мен қарағандылық «Шахтёр» клубының бұрынғы бас бапкері Ресей Премьер-лигасында ойнайтын «Крылья Советов» командасының тізгінін ұстады, деп хабарлайды Sport12.kz.

Қос тарап тағы бір маусымға ұзарту мүмкіндігі қарастырылған 2026 жылға дейін жарамды келісімшартқа қол қойды.

Магомед Мұсаұлы футболшы кезінде «Анжи», ЦСКА, «Терек», «Жеңіс», «Нижний Новгород» және басқа да клубтардың шабуыл шебінде ойын көрсеткен.

2011 жылы бапкерлік салаға бет бұрып, ресейлік «Волга», «Ахмат», «Анжи», «Чайка», «Химки» сынды клубтарды баптаған.

Еске салсақ, Магомед Адиев Қазақстан құрамасын 2022-2024 жылдар аралығында жаттықтырды. Оның тұсында ұлттық команда Ұлттар лигасының C тобында топ жарып, Еуро-2024 турнирінің іріктеу кезеңінде жарқын ойын көрсетті. Сонымен қатар Адиев 2021-2022 жылдары қарағандылық «Шахтердың» бас бапкері қызметінде жұмыс істеді.