Путинцева мен Носкова Дубайдағы турнирде таң қалдырды

Inbusiness.kz хабарлауынша, қазақстандық теннисші Юлия Путинцева чехиялық спортшы Линда Носковамен бірге Дубайдағы WTA 1000 турнирінде (жүлде қоры — 3,6 млн доллардан астам) әсерлі нәтижеге қол жеткізді.

Қызығы Dubai Duty Free Tennis Championships-2025 жекелей сайысында Носкова бірінші айналымда Путинцевадан күшті болып шықты. Алайда жұптық сайыста спортшылар күштерін біріктіруге шешім қабылдады. Ван Синь Юй — Чжэн Сайсай қытай дуэтін жеңгеннен кейін қазақ-чех жұбы турнирдің екінші нөмірлі жұбымен кездесті.

Канада-австралиялық жұп Габриэлла Дабровски мен Эрин Рутлиффке қарсы ойында тартысты күрес өрбіді: бірінші сет фавориттердің еншісінде — 6:4. Екінші партияда Путинцева мен Носкова басым болды — 6:3. Шешуші супер тай-брейкте рейтингсіз теннисшілер (4-0 есебімен жылдам алға шықты) сенімді түрде жеңіске жетті — 10:2.

Бүгін Путинцева-Носкова беделді турнирдің жартылай финалына шығу құқығы үшін қытайлық жұп Сюй Ифань — Чжаосюань Янмен күш сынасады.