ПСЖ жанкүйерлері ЧЛ финалында Луис Энрикені ерекше баннермен тебірентті

Луис Энрике «ПСЖ»-ді Чемпиондар лигасындағы ұзақ күткен жеңіске жеткізді — париждіктер «Альянц Аренада» «Интерді» 5:0 есебімен тас-талқан етті.

Француз клубының жанкүйерлері он жыл бұрынғы естелік сәтті қайта жаңғыртып, ерекше баннер дайындады — онда бапкер мен қызы Ксана түпнұсқа «Барселона» формасының орнына «ПСЖ» стиліндегі киіммен бейнеленген.

Испан маманының қызы 2019 жылы остеосаркомадан қайтыс болды — ол небәрі тоғыз жаста еді.

«Ксана бізбен тамаша 9 жыл өткізді. Физикалық тұрғыдан ол жоқ, бірақ рухани әрдайым жанымызда — біз оны күн сайын еске аламыз. Өзімді бақытты санаймын», — деді Луис Энрике.