ПСЖ-дің бас бапкері Луис Энрике велосипед апатына ұшырады

«Пари Сен-Жермен» клубының бас бапкері Луис Энрике велосипедпен серуендеу кезінде жарақат алды — маманға бұғана сынығы диагнозы қойылды.

Клуб 55 жастағы бапкерге қолдау білдіріп, алдағы операция туралы хабарлады.

«Клуб толық қолдау білдіріп, тезірек сауығып кетуін тілейді. Қосымша ақпарат кейінірек берілетін болады», — делінген ПСЖ мәлімдемесінде.

Энрикенің жетекшілігімен соңғы ойынды париждіктер «Тулузаға» қарсы өткізіп, 6:3 есебімен жеңіске жетті. Команданың келесі ойыны «Лансқа» қарсы өтеді, содан кейін «Аталантамен» матчпен Чемпиондар лигасының титулын қорғау басталады.

ПСЖ-де екі жыл жұмыс істеген испан маманы командаға чемпионат, Франция Кубогы және клуб тарихында алғаш рет Чемпиондар лигасында жеңіске жетуге көмектесті.