Постекоглу Еуропа лигасының финалында екінші маусымдағы жеңіс дәстүрін жалғастыра алады

BBC Sport мәліметінше, «Тоттенхэм» бас бапкері Анге Постекоглу командамен жұмыстың екінші маусымында жеңіске жету дәстүрін жалғастырудың бір қадам алдында тұр.

Шамамен екі жыл бұрын «шпорларды» басқарған австралиялық маман ертең Бильбаода «Манчестер Юнайтедке» қарсы Еуропа лигасының финалында команда басындағы жүзінші матчын өткізеді.

«Мен әрдайым екінші жылы трофейлер жеңіп аламын. Ештеңе өзгерген жоқ. Мен өзім сенбейтін нәрсені айтпаймын», — деді Постекоглу маусым басында.

Бапкердің сөзін статистика растайды — ол «Саут Мельбурн», «Брисбен Роар» және «Йокогама Маринос» командаларымен жұмыстың екінші маусымында чемпион атанған. Австралия құрамасымен тағайындалғаннан кейін екі жылда Азия Кубогын жеңіп алса, «Селтикпен» барлық ішкі трофейлерді жеңіп алды.

«Ол шынымен жоғары деңгейдегі маман. Оның не қалайтыны туралы нақты көзқарасы бар және ең жақсысы — сізді үнемі алға жетелейтін адаммен жұмыс істеу», — деді «Селтиктің» бұрынғы қақпашысы Джо Харт.

Ертеңгі финалдағы жеңіс Постекоглудың әсерлі сериясын жалғастырып қана қоймай, «Тоттенхэмге» келесі маусымға Чемпиондар лигасына жолдама береді.