Португалдық БАҚ Алматыда өтетін «Витория» матчын талқылауда

Алматыда өтетін «Астана» мен «Витория» Гимарайнш арасындағы алдағы матч португалдық ақпарат құралдарында үлкен қызығушылық туғызды. Жергілікті БАҚ Португалия командасының кездесетін логистикалық қиындықтары мен климаттық жағдайларына назар аударып отыр.

A BOLA басылымы мақаласын келесі тақырыппен жариялады:
«12 сағаттық сапар, аязды ауа райы және құрам мәселелері: «Витория» Гимарайнш Қазақстанға аттанады»

Журналист Жоау Агре команда -6°C-тан -13°C-қа дейінгі температура мен бес сағаттық уақыт айырмашылығы жағдайында ойнайтынын атап өтті.

Қиындықтарға қарамастан, «Витория» еурокубоктардағы жетістіктеріне сенім артып, матчқа оптимизммен қарайды. Команда іріктеу кезеңіндегі барлық ойындарда жеңіске жетті және топтық кезеңде үш рет жеңіске қол жеткізіп, клуб тарихындағы үздік еуропалық көрсеткішін тіркеді.

O Jogo порталы да ұзақ сапар мен құрамның мәселелерін атап өтіп, алдағы матчқа шолу жасады. Басылым Қазақстан чемпионатында екінші орын алған «Астана» туралы ақпаратты бөлісті және олардың маусымды «Қайратқа» бір ұпай ғана жол беріп аяқтағанын жазды.

Diário do Minho порталы «Виторияның» еурокубоктардағы позициясын егжей-тегжейлі баяндап, «Астана» туралы қысқа деректер келтірді. Қазақстандық клубтың Конференция Лигасында тек үш ұпай жинап, сербиялық «TSC» командасын жеңгені атап өтілді.

Guimarães Digital порталы бұл сапарды «Витория» үшін УЕФА турнирлеріндегі ең ұзақ сапар деп атады. Гимарайнштан Алматыға дейінгі қашықтық – 6680 шақырым.

Ұшар алдында клуб президенті Антониу Мигел Кардоза Sapo Desporto басылымына берген сұхбатында команданың алдағы қиындықтарға дайын екенін айтты:
«Бұл ойында бірқатар кедергілер бар, бірақ біз дайынбыз. Мұнда ешқандай сылтау болмауы тиіс. Матчтың суықта өтетінін және жолдың алыстығын білеміз, бірақ үш ұпай алуға барымызды саламыз.»

Кардоза сонымен қатар клубтың еурокубоктардағы тоғыз матчтық жеңіс сериясына тоқталып, команда жетістіктерімен мақтанатынын айтты. Бірақ сонымен бірге қарапайымдылық пен бәсекеге қабілеттілікті сақтау қажеттігін еске салды.