Поль Погба «Зениттің» ұсынысынан бас тартты

«Манчестер Юнайтед» пен «Ювентустің» бұрынғы жартылай қорғаушысы Поль Погба Қазақстан құрамасының қорғаушысы Нұралы Әліп ойнайтын «Зенит» клубының ұсынысын қабылдамады.

Ресейлік клуб француз футболшының өкілдерімен келіссөздер жүргізіп, жалақы бойынша нақты ұсыныс жасады. Алайда, тараптар ортақ мәмілеге келе алмады.

31 жастағы Погбаның мансабындағы қиындықтар допинг дауына байланысты басталды — оның сынамасынан тестостеронның жоғары деңгейі табылған болатын. Алғашында төрт жылға белгіленген ойнауға тыйым CAS шешімімен бір жарым жылға дейін қысқартылды, бұл наурыз айында футболшыға алаңға оралуға мүмкіндік береді.

Желтоқсан айының басында «Ювентус» Погбамен келісімшартты бұзды, содан бері ол еркін агент мәртебесінде қалды.