Пилатти: «Лара тек бір жағдайда ғана Жәнібекті жеңе алады»

ESPN журналисі Бернардо Пилатти кубалық Эрисланди Лара қандай жағдайда қазақстандық Жәнібек Әлімханұлын жеңе алатынын айтып берді, деп хабарлайды Prosports.kz.

6 желтоқсанда Сан-Антониода өтетін жекпе-жек WBA, IBF және WBO белбеулерінің бірігуі үшін ұйымдастырылмақ. Пилаттидің сөзінше, Лараның басты мүмкіндігі — Жәнібекке қолайсыз, баяу әрі «жабысқақ» бокс мәнерін таңу.

«Жәнібекке тез бейімделіп, бастаманы өзіне алып, темпті өзі үдету керек. Осыны орындай алса, нокаут мүмкіндігі бар. Бірақ бұл оңай емес — Лараны қысып тастау қиын, ол алмасуға бармайды. Темп Лараға қолайлы бола бастаса, жекпе-жек баяу, бірсарынды, тіпті көрермен үшін ұнамсыз болуы мүмкін. Бірақ дәл осындай стильде ол жеңіске жиі жетеді. Егер Лара ұтатын болса — тек осы тәсілмен», — деді Пилатти.

42 жастағы Лара соңғы рет 2024 жылдың қыркүйегінде шаршы алаңға шығып, экс-чемпион Дэнни Гарсияны жеңген. Ал 32 жастағы Жәнібек биыл сәуірде Астанада франциялық Ануэль Нгамиссенгені нокаутпен тоқтатқан болатын.