Пегула Синнердің ісіне байланысты допингпен күрес жүйесін қатаң сынға алды

Америкалық теннисші Джессика Пегула әлемнің бірінші ракеткасының дисквалификациясы туралы пікір білдірді, деп хабарлады The National.

Ақпан айының басында Янник Синнер 2024 жылдың наурызында тапсырған допинг-сынамасынан клостеболға оң нәтиже шыққаны үшін үш айға жарыстардан шеттетілді. Дисквалификация 4 мамырға дейін жалғасады. Бастапқыда WADA оны 1 жылдан 2 жылға дейін шеттетуді талап еткен, бірақ спортшы қысқартылған мерзімге келіскеннен кейін апелляциядан бас тартты.

«Ол кінәлі ме, жоқ па, маңызды емес, процестің өзі мүлдем дұрыс емес. Олар тек өздерінің факторларын ескеріп, спортшыларға қатысты әділетсіз көрінетін шешімдер қабылдайды», – деді Пегула.

«Сен таза болсаң да, болмасаң да – қарау үдерісі бейберекет өтті. Менің ойымша, мұны мұқият зерттеу керек: олардың біреудің мансабын құртуға тым көп мүмкіндіктері бар», – деп қосты теннисші.

Пегуланың пікірінше, қазіргі жағдай ойыншылардың допингтік істерді қарау жүйесіне деген сенімін толық жоғалтуына әкеліп, бұл жалпы спортқа кері әсерін тигізеді.