Отабек Холматов Boxrec рейтингінде қайта үздік 40-қа енді

Boxrec.com мәліметінше, өзбекстандық боксшы Отабек Холматов (13-1, 12 КО) Астанада өткен бокс кешінде сәтті өнер көрсетіп, жартылай жеңіл салмақтағы рейтингте 32-орынға көтерілді.

Холматов филиппиндік Джейсон Каной Манигоспен (30-13-2, 20 КО) өткен жекпе-жекте сегізінші раундта техникалық нокаутпен жеңіске жетті. Бұл жеңіс оның Boxrec рейтингіндегі қайта оралуына мүмкіндік берді.

Айта кетейік, бұған дейін Холматов белсенді емес мәртебесінде болған. Оның соңғы жекпе-жегі 2024 жылдың наурызында өткен болатын. Сол кезде ол америкалық Рэймонд Фордтан (17-1-1, 8 КО) он екінші раундта техникалық нокаутпен жеңіліп, кәсіби мансабындағы алғашқы жеңілісін тіркеген еді.