Орта салмақтағы WBC титулы үшін күрес: Адамекс Ширазға қарсы

ESPN инсайдері Сальвадор Родригестің ақпараты бойынша, жақын арада орта салмақтағы WBC белбеуі үшін әлем чемпионаты туралы ресми хабарландыру жасалады. Бұл тартысты жекпе-жекте Доминикандық белбеу иегері Карлос Адамес пен британдық үміткер Хамза Шираз кездеседі.

Алдын ала мәліметтерге сәйкес, жекпе-жек 2025 жылдың ақпанында Сауд Арабиясында өтеді. Шираздың промоутері Фрэнк Уоррен бұл айқас туралы бұған дейін де айтқан еді, бірақ қарсыласының есімін атамаған болатын.

“Менің боксшым ақпан айында әлем чемпионы атағы үшін күреседі,” – деп мәлімдеген Уоррен.

Айта кетейік, бастапқыда Хамза Шираз WBO және IBF белбеулеріне міндетті үміткер ретінде қазақстандық чемпион Жәнібек Әлімханұлымен жекпе-жекке шығуға жоспарланған болатын. Алайда, оның командасы WBC чемпионы Карлос Адамеспен жұдырықтасуды таңдады.

Жекпе-жектің нақты күні мен орны алдағы уақытта жарияланатын болады.