«Ордабасының» жеңіске жетуге мүмкіндігі мол – футбол сарапшысы Нүркен Мырзағалиев алдағы «Ордабасы» – «Ақтөбе» матчы туралы

1 наурызда шымкенттік «Ордабасы» «Түркістан Арена» стадионында «Ақтөбеге» қарсы ойнайды. Екі клуб та жүлдеге жоғары мүмкіндігі бар үміткерлер қатарында.

«Ордабасы» жүргізген кадрлық өзгерістер оң нәтиже көрсетіп, команда маусымды жеңіспен бастай ала ма? Әлде «Ақтөбе» Суперкубоктағы сәтсіздіктен кейін ес жинап, осы жолы өз деңгейін жоғары екенін дәлелдей ме?

Футбол сарапшысы Нүркен Мырзағалиев Sport Pulse порталына өз ойымен бөлісті.

«Ордабасы» – қайта құру кезеңіндегі команда

«Мен екі команданы да оқу-жаттығу жиындарында бақыладым, және айта кетерім – «Ордабасы» қайта құрылу процесінде. Командаға жас қазақстандық ойыншылар қосылды, клубтың түлегі болған футболшылар оралды, сондай-ақ тәжірибелі легионерлер келді. Құрам жағынан клубтың күшейгенін нақты айту қиын, бірақ маңызды фактор – жаңа бас бапкер Андрей Мартиннің жұмысы.

Бұл молдовалық маман бұған дейін «Петрокубта» қызмет атқарды, және дәл осы команда өткен маусымда «Ордабасыны» Чемпиондар лигасынан шығарып жіберген еді. Мартиннің футболға деген өзіндік көзқарасы бар, ол команданың ойынын құра білетін бапкер. Әрине, екі айда команданы түбегейлі өзгерту қиын, сондықтан чемпионаттың алғашқы кезеңінде «Ордабасы» әлі де бабына келу үстінде болады.

Дегенмен, оқу-жаттығу жиындарында команда агрессивті прессингке, жылдам шабуылдарға және допсыз ойындағы белсенділікке басымдық беретінін көрсетті. Қорғаныста Сергей Малый ерекшеленуде – ол лигадағы ең тәжірибелі қорғаушылардың бірі, ал оның жанында Молдова құрамасынан келген Андрей Мудрак ойнайды. Орталық алаңда негізгі рөлді Асхат Тағыберген атқарады, ал шабуылда грузиялық форвард Лука Имнадзеге назар аударған жөн».

«Ақтөбе» өз ойынын іздеуде

«Ақтөбе», керісінше, оқу-жаттығу жиындарында жақсы әсер қалдырмады. Суперкубокта команда «Қайраттың» қақпасына бірде-бір дәл соққы жасай алмады, және жалпы ойыны бойынша сұрақтар көп. Футболшылар әлі де бабына келмеген, құрамда мәселелер бар: Габи Кики бұл матчқа қатыспауы мүмкін, ал Богдан Вэтэжэлу енді ғана қалыпқа келді. Сербиялық шабуылшы Джордже Ивкович жақында ғана командаға қосылды, сондықтан толық дайын емес.

Сонымен қатар, «Ақтөбе» командаға аса қажет плеймейкермен күшейе қойған жоқ. Нигериялық жартылай қорғаушы Марио Рабиу Суперкубок алдында ғана келді және ойын үлгісіне әлі бейімделмеген. Жалпы, әзірге команданың нақты ойын өрнегі көрінбейді, бұл чемпионаттың алғашқы турында «Ақтөбе» үшін үлкен мәселе болуы мүмкін.

Матчқа болжам

«Ордабасы» фаворит ретінде көрінеді, әсіресе өз алаңында ойнайтынын ескерсек. Бірақ көктемгі футбол факторы бар: командалар оқу-жаттығу жиындарынан кейін әлі толық бабына келген жоқ, сондықтан сақтықпен ойнауы мүмкін.
Дегенмен, менің ойымша, бұл матчта «Ордабасы» жеңіске жетуге көбірек мүмкіндікке ие».

«Ордабасы» – «Ақтөбе» матчы 16:00-де басталады. Тікелей эфирді «Qazsport» арнасынан көруге болады.

Бұған дейін Нүркен Мырзағалиев «Атырау» – «Елімай» матчы туралы пікір білдірген еді.

Басты сурет: «Ақтөбе»ФК