Нуно Эшпириту Санту Ноттингем Форестпен келісімшартын ұзартты

Нуно Эшпириту Санту «Ноттингем Форестпен» жаңа үш жылдық келісімшартқа қол қойды — бұл туралы клубтың ресми сайты хабарлайды.

Бір жарым жыл бұрын команданы қолға алған португалдық маман «ормандықтарды» Премьер-лигада жетінші орынға жеткізді — бұл клубқа үш онжылдықтан кейін алғаш рет еуропалық турнирлерге қатысуға мүмкіндік берді.

«Мен осы керемет футбол клубындағы жолымызды жалғастыру мүмкіндігіне өте қуаныштымын. Форестке келген сәттен бастап, біз ойыншылар, жанкүйерлер және клубтағы барлық адамдар арасында ерекше байланыс орнатуға қатты еңбек еттік, бұл бізге үлкен жетістіктерге жетуге көмектесті», — деді Санту.

Клуб иесі Эвангелос Маринакис бапкердің футболшылардың әлеуетін барынша ашу және жас ойыншыларды дамыту қабілетін атап өтті. Қаржылық ережелерді бұзғаны үшін төрт ұпай алынып тасталғанына қарамастан, команда элиталық дивизионда орнын сақтап қалды, сондай-ақ 34 жылдан кейін алғаш рет Англия Кубогының жартылай финалына дейін жетті.