«Ноттингем Форест» — еурокубоктар табалдырығында: Джемсон клубтың тарихи маусымы туралы айтты

«Ноттингем Форесттің» бұрынғы шабуылшысы Найджел Джемсон East Midlands Today басылымына берген сұхбатында клубтың қазіргі жетістіктері мен болашағы туралы пікір білдірді. Ұзақ жылдар бойы турнир кестесінің төменгі жағында жүрген команда биыл алғаш рет еурокубоктық орындарға таласып отыр.

Өткен маусымда әрең дегенде Премьер-лигада қалуға қол жеткізген «Форест» қазіргі таңда «Челсимен» бірге алтыншы орынды бөлісіп тұр. Алдағы «Брентфордпен» ойында жеңіске жетсе, клуб алғашқы үштікке енуді мақсат ете алады.

«Бізде клубты қолдап, оған қаржы құйып отырған инвесторлар бар және бұл үлкен өзгерістерге жол ашты. Биылғы жетістігімізді ешкім болжай алған жоқ», — деді Джемсон.

Айта кетейік, «Ноттингем Форест» соңғы ірі трофейін осыдан 35 жыл бұрын жеңіп алған. Ол кезде команда Лига кубогында жеңіске жетіп, шешуші голды дәл осы Джемсон соққан болатын. Жақында команда Англия Кубогының жартылай финалында «Манчестер Ситиге» жол бергенімен, Премьер-лигада жоғары орындардан үміт үзген жоқ.

«Чемпиондар лигасы бола ма, әлде Еуропа лигасы ма — маңызды емес. Ең бастысы, біз ұзақ үзілістен кейін “Форестті” Еуропада қайта көреміз. Маусым басында тіпті оныншы орынға да риза болар едім», — деп түйіндеді ардагер футболшы.