Норвегия футбол қауымдастығы Израильмен матчтан түскен қаражатты Палестинаға жібереді

Норвегия футбол қауымдастығы шешім қабылдады — Израиль құрамасына қарсы алдағы матчтан түскен қаражат Палестина тұрғындарына гуманитарлық көмекке жұмсалады, деп хабарлайды ESPN.

2026 жылғы әлем чемпионатының іріктеу матчы 11 қазанда Норвегияда өтеді деп жоспарланған.

Біз де, басқа ұйымдар да гуманитарлық дағдарысқа байланысты зардаптарға және Газа азаматтық тұрғындары ұзақ уақыт бойы ұшырап отырған шабуылдарға немқұрайлы қарай алмаймыз. Біз жиналған қаражатты Газада күн сайын өмірлерді құтқарып, жергілікті жерде белсенді түрде шұғыл көмек көрсетіп жатқан гуманитарлық ұйымға қайырымдылық ретінде бергіміз келеді, — деді Норвегия футбол қауымдастығының президенті Лисе Клавенесс.