Нигериялық футболшы Қазақстан мен Еуропаның футбол мәдениетін салыстырды

Meta-ratings.kz-ке берген сұхбатында «Ақтөбе» футбол клубының қорғаушысы, нигериялық Уче Агбо Қазақстан мен Еуропадағы футбол арасындағы айырмашылықтар туралы өз пікірін білдірді.

Агбо ең алдымен инфрақұрылымға тоқталып, Еуропадағы спорттық инфрақұрылым Қазақстандағыдан әлдеқайда жоғары екенін атап өтті. Дегенмен, ол Қазақстандағы футболдың дамуындағы оң өзгерістерді көретінін айтып, клубтардың материалдық-техникалық базасын жақсарту бағытында белсенді жұмыс істеп жатқанын құптады.

Сондай-ақ, ол жанкүйерлердің ойынға деген көзқарасының өзгешеліктерін де атап өтті. Еуропада футболға деген көзқарас бейтараптау болса, Қазақстанда жанкүйерлер командалар мен ойыншыларды қатаң сынауға бейім. Агбо бұл айырмашылықты екі аймақтың футбол мәдениетінің ерекшелігі деп түсіндірді.

Еуропалық чемпионаттарда мол тәжірибе жинаған Уче Агбо бұған дейін Испанияның «Гранада» және «Райо Вальекано», Португалияның «Брага», Бельгияның «Стандарт» және Словакияның «Слован Братислава» командаларында ойнаған. «Ақтөбе» сапында биыл 26 матчқа қатысып, үш гол мен үш нәтижелі паспен көзге түсті.

Еске салсақ, «Ақтөбе» биыл Қазақстан Кубогының иегері атанып, ұлттық чемпионатта үшінші орынды иеленді.