Неапольдік төрешілер «Наполи» матчтарын жүргізуден өз еркімен бас тартты

Football Italia хабарлағандай, Марко Гуида мен Фабио Мареска — екеуі де Неаполь провинциясынан шыққан Италияның кәсіби төрешілері — Италия төрешілер қауымдастығы аймақтық шектеулерді алып тастағанына қарамастан, «Наполи» матчтарын басқарудан саналы түрде бас тартты.

Марко Гуида бұл шешімін былай түсіндірді:

«Біз «Наполи» ойындарын басқаруға құқылымыз, бірақ бұлай істемеуге шешім қабылдадық. Неапольде футболға көзқарас басқаша — мұнда эмоция тым жоғары. Менің үш балам, өз кәсібі бар әйелім бар. Балаларымды мектепке тыныш апарғым келеді», — деді ол.

Гуида қателіктерден кейін туындайтын қысым мен қауіп-қатерлер туралы да айтты:

«Төрешілік қателіктен кейін көшеде, дүкенде жүру — қиын. Бірнеше күн үйден шыға алмай қалатын жағдайлар болады. Бұл мені қатты алаңдатады», — деді тәжірибелі маман.

Сонымен қатар, ол жастар футболындағы төрешілерге қатынас мәселесін де көтерді. Оның айтуынша, кей ата-аналар агрессия танытып, болашағынан үміт күттіретін жас төрешілерді кәсіби жолынан тайдыруы мүмкін.

«Серия А-да жұмыс істеуді армандайтын жас төрешілерді ата-аналар балағаттап, моралдық қысым көрсетеді — бұл өте үлкен мәселе», — деп түйіндеді Гуида.

Біздің парақшамыздан футбол матчтарының барлық нәтижелерін Live форматта бірінші болып біліңіз!