НБА: «Миннесота» — «Детройт» матчында жаппай төбелес болды, жеті адам алаңнан қуылды

«Миннесота Тимбервулвз» НБА-ның тұрақты чемпионатында «Детройт Пистонсты» 123:104 есебімен жеңді. Алайда матч спорттық нәтижеден гөрі, екінші ширектегі жаппай жанжалмен есте қалды.

Ойын Рон Холландтың Наз Ридке қарсы ереже бұзуынан кейін тоқтатылды. Алаңда қақтығыс басталып, трибуналарға дейін жалғасқан. Тіпті қос команданың жаттықтырушылар штабы да төбелеске араласқан.

Оқиғаның нәтижесінде төрешілер жеті қатысушыны алаңнан шығарды:

• Наз Рид пен Донте Дивинченцо («Миннесота»)
• Айзейя Стюарт, Маркус Сэссер және Рон Холланд («Детройт»)
• «Детройттың» бас бапкері Джей Би Бикерстафф
• «Миннесотаның» көмекші бапкері Пабло Приджиони

Төрешілердің мәлімдеуінше, қақтығысты Айзейя Стюарт бастаған — ол қарсылас ойыншыларды әдейі арандатқан. НБА басшылығы тарапынан қосымша тергеу жүргізіліп, жаза қолданылуы мүмкін.