Мусиала ПСЖ-мен матчта ауыр жарақат алды

Мюнхеннің «Бавария» клубының жартылай қорғаушысы Джамал Мусиала Клубтық әлем чемпионатында «Пари Сен-Жермен» командасына қарсы ойында ауыр жарақат алды. Бірінші таймда 22 жастағы футболшы париждік команданың қақпашысы Джанлуиджи Доннаруммамен соқтығысып — аяғын сындырып, тобығын шығарып алды.

«Мұндай жағдайлар болып тұрады, енді мен алдағы уақытты күш-қуатымды қалпына келтіруге және оң көзқарасты сақтауға жұмсаймын. Операция сәтті өтті, маған жақсы күтім көрсетілуде және мұнда ешкімнің кінәсі жоқ екенін айтқым келеді», — деді Мусиала Instagram-дағы бейнеүндеуінде.

Неміс жартылай қорғаушысы сәтті операциядан өтіп, қалпына келтіру жұмыстарын бастап кетті. Клуб мәліметі бойынша, ойыншының емделуі бірнеше айға созылады. Өткен маусымда Мусиала 21 гол соғып, 8 нәтижелі пас берген, «Баварияның» чемпиондық атағын жеңіп алуына көмектескен.