ММА төрешісі: UFC маусымы әлдеқайда жарқын басталар еді, әйелдер дивизионында интрига жоғалуда

Өткен жексенбіде Лас-Вегаста UFC Fight Night 249 турнирі өтті. Кештің басты жекпе-жегінде бразилиялық спортшы Маккензи Дёрн (15-5) өз отандасы Аманда Рибасты (14-5) тізе бүктірді.
Ал UFC-дің жаңа америкалық файтері Джейкоб Смит (10-0) Престон Парсонстан (11-6) мықты екенін дәлелдеді. Ол көрермендерді бірінші раундта әсерлі нокаутпен таңғалдырды.
Тәжікстандық жеңіл салмақ өкілі Нурулло Алиев (10-0) америкалық Джо Солеккиді (13-6) төрешілердің бірауызды шешімімен жеңді.
Ерекше көзге түскен ресейлік орта салмақ өкілі Роман Копылов (14-3). Ол Крис Кёртисті (31-12) техникалық нокаутпен жеңді. Бұл айқас кештің ең үздік жекпе-жегі деп танылды.
Sport Pulse-ке берген сұхбатында ММА бойынша халықаралық санаттағы төреші Айбек Тілеубай UFC-дің 2025-жылғы алғашқы бәсекесіне қатысты пікір білдірді.

– UFC Fight Night 249 бәсекесіне қандай баға бересіз?

– UFC жаңа жылды Лас-Вегастағы турнирмен бастады, жалпы алғанда, бұл өте әсерлі кеш болды. Бастапқы кардта 8 жекпе-жек, негізгі кардта 6 жекпе-жек өтті. Мерзімінен бұрын аяқталатын айқастарды ұнататындар үшін бұл турнир мереке болды. Өйткені, бастапқы кардтағы 8 жекпе-жектің төртеуі, ал негізгі кардтағы 6 жекпе-жектің бесеуі ерте аяқталған. Бұл 2025-ші жыл үшін керемет бастама.

– Турнирдің ең жарқын сәттері қандай болды?

– Мерзімінен бұрын аяқталатын жекпе-жектер кештің сәнін келтіреді. Бірақ болашақ жұлдыздар қатарына қосылуға лайықты спортшылар туралы айтатын болсақ, бұл турнир үлкен жаңалық әкелген жоқ. Бұл таңқаларлық жәйт емес: UFC Fight Night-тің, әдетте, нөмірленген турнирлерге қарағанда маңыздылығы төмен. Дегенмен, мұндай кештер болашақ жұлдыздар мен чемпиондар үшін маңызды бастама алаңы болып табылады.

– Маккензи Дёрн мен Аманда Рибас жекпе-жегі туралы не ойлайсыз?

– Бұл айқас кештің басты жекпе-жегі болды. Маккензи Дёрн Аманда Рибасты сенімді түрде жеңді. Алайда, UFC-дің әйелдер дивизионы қазір белгілі бір дағдарысты бастан кешіруде. Бәсекелестік Ронда Роузи дәуіріндегі деңгейде емес, спортшылардың көрермендерді қызықтыра алатын жарқын жекпе-жектері аз.

– 2025 жылды UFC Fight Night-пен бастау дұрыс шешім болды ма?

– Менің ойымша, маусымды маңыздылығы жоғарырақ турнирмен, мысалы, UFC 311 нөмірленген турнирімен бастаған жөн болар еді. Бұл жаңа маусымға көбірек назар аударып, маркетинг тұрғысынан тиімді болар еді. Дегенмен, Fight Night – жас спортшылар үшін дәстүрлі алаң, ал көптеген көрермендер мұндай турнирлерді күтпеген нәтижелері үшін бағалайды.

– UFC-дің алдағы турнирлерінің қайсысы Сізді көбірек қызықтырады?

– Әрине, басты қызығушылық UFC 311 бәсекесінде, онда Ислам Махачев пен Арман Царукян реванш өткізеді. Егер Махачев чемпиондықты қорғай алса, ол біздің Шавкат Рахмоновпен кездесуі мүмкін, бұл қазақстандық ММА үшін маңызды оқиға болмақ. Бірақ алдымен UFC 311 турнирінің нәтижесін күтейік, ол көп нәрсені анықтайды.