Миланның «Интері» Хорватиядан жас жартылай қорғаушыны сатып алды

«Интердің» ресми сайтының мәліметінше, милан клубы Загребтің «Динамосынан» Петар Сучичті трансферлеуді аяқтады.

21 жастағы хорват жартылай қорғаушысын сатып алу мәмілесі «нерадзурриге» 14 миллион еуроға түсті — қосымша бонустар ретінде 2,5 миллион төленуі мүмкін. Загреб клубы сондай-ақ футболшыны болашақта қайта сатудан түсетін пайызды сақтап қалды.

Өткен маусымда Хорватия біріншілігінде Сучич нәтижелі ойыншы ретінде көзге түсті — 26 матчта бес гол соғып, екі голдық пас берді.