Микель Артета: «Трофей алу — сәттіліктің де үлесі бар»

«Арсенал» бас бапкері Микель Артета соңғы маусымдарда команданың трофейлерсіз қалуы туралы пікір білдіріп, бұл жағдайды сәттілік пен уақытпен байланыстырды.

«Трофейлерді жеңу үшін тек жақсы ойнау аздық етеді — бұл дұрыс уақытта, дұрыс орында болу мәселесі. Мысалы, Ливерпуль біз соңғы екі маусымда жинаған ұпайдан аз ұпаймен чемпион атанды», — деді Артета.

Қазіргі таңда «Арсенал» Чемпиондар лигасының жартылай финалындағы шешуші матчқа дайындалып жатыр — бірінші ойында команда ПСЖ-дан 0:1 есебімен жеңілген болатын. Жеңген команда финалда қос матч қорытындысы бойынша «Барселонаны» 7:6 есебімен сүріндірген «Интермен» кездеседі.

Айта кетейік, «Арсенал» соңғы рет 2020 жылы Англия Кубогын жеңіп алған. Ал Чемпиондар лигасының жартылай финалына лондондық клуб соңғы рет 2009 жылы шыққан болатын.