«Мен өзімді айыптауым керек»: Гвардиола Хусановтың «Челсиге» қарсы матчтағы дебюттік қателігі туралы

«Манчестер Сити» клубының бас бапкері Хосеп Гвардиола Абдукодир Хусановты АПЛ-дың 23-турындағы «Челсиге» қарсы матчтың негізгі құрамында шығарғаны қателік болды деп мойындады, деп хабарлайды Sport+.

Аталған кездесуде, «Сити» 3:1 есебімен жеңіске жетсе де, Хусанов екінші минутта қателік жіберіп, нәтижесінде гол соғылды, ал төртінші минутта сары қағаз алды. 54-минутта ол ойыннан ауыстырылды.

«Сіз білесіз бе, қанша орталық қорғаушы дәл Хусанов секілді қателеседі?! Мен оны кінәламаймын, керісінше, өзімді айыптауым керек. Біз әлі де қателіктер жіберудеміз. Ал қорғаушылар өз ойындарын жетілдіре беруі қажет.

Мен оны көпшілік алдында да, жеке де сынға алмадым және бір-ақ жаттығудан кейін командаға қосылған ойыншыларға бұлай жасағым да келмейді… Әділ болайық. Оған қолдау қажет. Егер мен Премьер-лигада, жаңа елде, басқа тілде сөйлейтін жаңа командада дебют жасап жатқан ойыншы болсам, өзіме көмек көрсетілгенін қалар едім.

Қазір Хусановтың жағдайы жақсы! Ол керемет дайындық жүргізді. Ол мұқият әрі жинақы. Барлығы жақсы…», – деді Гвардиола City Xtra арнасына Hayters TV баспасөз мәслихатындағы сұхбатында.

Біздің парақшамыздан футбол матчтарының барлық нәтижелерін Live форматта бірінші болып біліңіз!