Массимилиано Аллегри 11 жылдан кейін Миланға оралды

Массимилиано Аллегри «Миланның» бас бапкері қызметіне оралады — бұл туралы италиялық клубтың баспасөз қызметі хабарлайды.

57 жастағы маман Сержиу Консейсауды алмастырды, ол алты ай жұмыс істегеннен кейін қызметінен босатылған — оның басшылығымен «россонери» Серия А-да сегізінші орын алып, Италия Кубогының финалында «Болоньядан» жеңілген болатын.

Аллегри үшін бұл «Миландағы» екінші келуі — 2010-2014 жылдар аралығындағы алғашқы жұмыс кезеңінде ол командаға 2010/11 маусымында чемпиондық атақты әперді. «Миланнан» кеткеннен кейін италиялық маман «Ювентусты» басқарып, қатарынан бес чемпиондық атақ жеңіп алды және команданы Чемпиондар Лигасының финалына екі рет шығарды.

«Клуб Массимилиано мен оның штабын жылы қарсы алып, жұмыстарына сәттілік тілейді», — делінген «Миланның» мәлімдемесінде.