«Марсель» клубы «Пари Сен-Жерменмен» өткен матчтан кейін жартылай қорғаушы Адриен Рабьо мен оның отбасына жасалған шабуылдарға байланысты ресми мәлімдеме жасады, деп хабарлайды Radio France.
Ойын кезінде ПСЖ жанкүйерлері қорлайтын жазулар көрсетіп, нәсілшілдік және гомофобтық ұрандар айтты. Сонымен қатар, Марсельдің араб тұрғындарына бағытталған қорлау әрекеттері байқалды.
Адриен Рабьо бұрынғы клубының жанкүйерлері алты жыл бұрын қайтыс болған әкесіне тіл тигізгенін айтты. Оның анасы әрі агенті Вероник Рабьо ресми шағым түсірді.
«Неліктен матч тоқтатылмады? Кейбір ойындарда мұндай жағдайда матч тоқтатылады, ал бұл жолы неге олай болмады?» – деді Вероник Рабьо.
Француз төрешілерінің мұндай оқиғалар кезінде ойынды тоқтатуға құқығы болса да, бас төреші Клеман Тюрпен матчты жалғастырды. «Марсель» клубы Рабьо отбасының шағымын қолдап, жанкүйерлер мен қызметкерлерге қатысты қорлауларға жол бермейтінін мәлімдеді.
