Манчестер Сити Райан Айт-Нуриді 31 миллион фунтқа сатып алды

«Манчестер Сити» алжирлік қорғаушы Райан Айт-Нуриді «Вулверхэмптоннан» 31 миллион фунт стерлингке трансферледі.

24 жастағы футболшы Англия чемпионымен 2030 жылға дейін ұзақ мерзімді келісімшартқа қол қойды. Айт-Нури жаңа командасы үшін 18 маусымда марокколық «Видадқа» қарсы клубтық әлем чемпионатында ойнай алады.

Өткен маусымда Айт-Нури «Вулвз» сапында барлық турнирде 41 ойын өткізді — қорғаушы бес гол соғып, жеті нәтижелі пас берді, командасының Премьер-лигада орнын сақтап қалуына көмектесті.

«Сити — әлемдегі ең ірі клубтардың бірі, мұнда ойнау мүмкіндігі — шындыққа айналған арман. Мен Пеп Гвардиола және оның жаттықтырушылар штабымен жұмыс істеуді асыға күтемін», — деді Айт-Нури.

«Манчестер Сити» құрамын күшейтуді жалғастыруда — бұған дейін клуб «Миланның» жартылай қорғаушысы Тийяни Рейндерсті 46,3 миллион фунтқа алу туралы келісімге қол жеткізген болатын.