Манчестер Сити де Брюйненің мүсінін стадион маңына орнатады

«Манчестер Сити» Кевин де Брюйненің мүсінін өз алаңы маңына орнататынын жариялады — клубтың ресми сайты хабарлайды.

Бельгиялық жартылай қорғаушы «қалалықтар» үшін соңғы үй кездесуін өткізді — команда АПЛ-дің 37-ші турында «Борнмутты» жеңді.

«Этихад Стэдиум» маңында клубтың аңызға айналған ойыншыларының ескерткіштері бар:

• Венсан Компани
• Давид Сильва
• Серхио Агуэро
• Майк Саммерби
• Фрэнсис Ли
• Колин Белл

«Бұл мен әрдайым осы клубтың бір бөлігі болатынымды білдіреді. Мен мұнда отбасыммен және достарыммен қашан келсем де, өзімді көре аламын, сондықтан мен әрқашан осында боламын», — деді де Брюйне.

«Манчестер Ситидегі» он жылдық ойын барысында бельгиялық футболшы 421 матчқа қатысып, 108 гол соғып, 177 нәтижелі пас берді және 19 трофей жеңіп алды.