«Ливерпульдің» тәлімгері Арне Слот: Гвардиолаға жанашырлық танытудың қажеті жоқ

«Ливерпуль» Энфилдте «Манчестер Ситиді» 2:0 есебімен жеңді. Осыдан кейін мерсисайдтық клубтың бас бапкері Арне Слот матч туралы пікір білдіріп, Пеп Гвардиоланың командасына қатысты ойын жеткізді.

Голландиялық маман, «Сити» қатарынан төртінші рет жеңілгеніне қарамастан, испандық әріптесіне эмпатия көрсетудің қажеті жоқ екенін айтты:
«Эмпатия әдетте қиын жағдайда тұрған бапкерлерге қатысты болады – кестенің төменгі жағында тұрған немесе қатарынан көп матч жеңілгендерге. Бірақ Пеп бірнеше мәрте өзінің жоғары деңгейін дәлелдеді, көптеген титулдарды жеңіп алды. Сондықтан оған аяушылық білдіру орынсыз,» – деді Слот матчтан кейінгі баспасөз конференциясында.

Сондай-ақ, ол чемпиондық жарыстың әлі аяқталмағанын еске салып, өткен маусымды мысалға келтірді. Ол кезде «Сити» қарашада «Арсеналдан» сегіз ұпайға артта қалса да, маусым соңында чемпиондықты жеңіп алған еді:
«Пеп үшін алаңдаудың қажеті жоқ. Ол бұған дейін де қиын жағдайдан шығып, командасын жеңістерге жетелеген. Мен оның «Ситиді» қайтадан бұрынғы деңгейіне жеткізе алатынына сенімдімін.»

Ливерпуль осы аптада керемет нәтиже көрсетті. Олар Чемпиондар Лигасында жеңіске жетіп, кейін «Манчестер Ситиді» ұтты. Бірақ Арне Слот командасын салқынқанды болуға және тұрақты ойын көрсетуге шақырды:
«Сити» мен «Реал» сияқты клубтар көптеген титулдарға қол жеткізген. Бірақ олардың жетістігі тұрақтылықта – олар бір рет емес, үнемі жеңіске жетеді. Біз бұл жеңістерімізге қуанамыз, бірақ бұдан да жоғары нәтижелерге қол жеткізгіміз келеді. Бір-екі жеңіс маусым соңында табысқа жету үшін жеткіліксіз.»

Слот «Арсенал» мен «Челсиді» де чемпиондыққа таласуға қабілетті командалар ретінде атап өтті. Ол ойыншыларын маусым бойы тұрақты ойын көрсетуге шақырды және фитнесті сақтаудың маңыздылығын ерекше атап өтті:
«Ибрахима Конате, Конор Брэдли және Костас Цимикас жарақаттарын ескере отырып, біз ойыншыларымыздың физикалық жағдайын барынша сақтауға тиіспіз. Трент Александр-Арнольдты ертерек ауыстыру да алдағы маңызды матчтарға байланысты болды.»

Ливерпуль турнирлік кестеде «Манчестер Ситиден» 11 ұпай алда келеді. Бірақ Слот командасын жоғары деңгейде ойнауды жалғастыруға шақырып, маусым соңына дейін зейінді жоғалтпау керектігін айтты.