Ливерпуль бапкері Салахтың «Алтын доп» алу мүмкіндігі туралы айтты

Арне Слот Мохамед Салахтың «Алтын доп» жүлдесіне үміткер болу мүмкіндігі туралы пікір білдірді.

«Бәрі шеберлікке байланысты емес пе? Мо есімінің аталуы оның жақсы ойын көрсетіп жатқанын және команданың жетістіктеріне үлес қосып жатқанын білдіреді. Үміткер мәртебесін сақтау үшін соңғы 7-8 айдағы деңгейді көрсетуі қажет», – деді «Ливерпуль» бас бапкері.

Оның пікірінше, «Алтын доп» иегері белгілі бір жетістікке жетуі керек, сондықтан алда үлкен сын күтіп тұр. «Қуантатыны – ол бұл сынды қабылдайды. «Ман Сити» қақпасына маңызды гол соғып, нәтижелі пас беріп қана қоймай, командалық нәтиже үшін де жұмыс істейді», – деді Слот.

Нидерландтық маман Салахтың екінші таймдағы қорғаныс әрекетін ерекше атап өтті. «Бұл – трофейлерді жеңіп алу үшін өте маңызды. Егер біз команда ретінде бір нәрсе жеңіп алсақ, оның «Алтын допқа» ие болу мүмкіндігі айтарлықтай артады», – деп түйіндеді бапкер.