Лионель Месси: «мен футболдағы барлық армандарымды орындадым»

Лионель Месси, Аргентина құрамасы мен «Интер Майами» клубының 37 жастағы шабуылшысы, футболдағы жетістіктері мен болашақ мақсаттары туралы өз ойларымен бөлісті. Championat.com жариялаған ақпаратқа сәйкес, аты аңызға айналған футболшы өзінің барлық армандарын жүзеге асырды деп санайды.

Месси өзінің футболдағы амбициясы туралы сұраққа мансабына терең ризашылығын білдірді:
«Маған барлық армандарымды жүзеге асыру және бала кезімде ойлағаннан да көп нәрсеге қол жеткізу бақыты бұйырды. Бұл Құдайдың сыйы. Мен кез келген футболшының басты арманы – әлем чемпионы болуды жүзеге асыра алдым. «Барселона» үшін өнер көрсеткен кезде көптеген атақтарға ие болдым. Сондай-ақ «ПСЖ» және қазір «Интер Майамидегі» жеңістер де бар. Мен жаңа биіктерге жету үшін бар күшімді саламын.»

Айта кету керек, Лионель Мессидің мансабының шыңы 2022 жылы Катарда Аргентина құрамасымен әлем чемпионатында жеңіске жеткен сәт болды. Бұл жеңіс оның көрнекті футбол мансабының шарықтау шегі болды, бірақ оның сөздерінен көрініп тұрғандай, аргентиналық мұнымен тоқтап қалмайды.