«Лион» мен «Ботафого» иесі ПСЖ туралы менсінбей сөйледі

Get French Football News мәлімдеуінше, «Лион» мен «Ботафого» футбол клубтарының иесі Джон Текстор әлемдік клубтық чемпионат қарсаңында «Пари Сен-Жермен» туралы өткір мәлімдеме жасады.

Бразилия чемпионаты мен Либертадорес Кубогын жеңіп, турнирге қатысу құқығын алған бразилиялық «Ботафого» топтық кезеңде париждік клубпен кездеседі.

«Біз Париждің шағын командасымен және үлкен тарихы бар клуб — мадридтік Атлетикомен ойнауымыз керек. Мен асыға күтудемін», — деді Текстор DAZN-ге берген бейнемәлімдемесінде.

«Лион» иесінің ПСЖ-ні сынға алуы бірінші рет емес — бұған дейін ол париж клубының қаржылық саясаты мен трансферлік әрекеттеріне қатысты наразылығын білдірген болатын.