Либертадорес кубогы алдында қайғылы оқиға: екі жас жанкүйер қаза тапты

Либертадорес кубогының «Коло-Коло» мен «Форталеза» арасындағы матчы алдында Чили астанасында қайғылы жағдай тіркелді — полициямен жанжал кезінде екі жасөспірім көз жұмды.

Оқиға Сантьягодағы «Монументаль» стадионына жүзден астам жанкүйердің заңсыз кіруге тырысқан сәтінде орын алды. Құқық қорғау органдары оларға тосқауыл қойған кезде қоршау құлап, 13 және 18 жастағы екі жанкүйер қайтыс болды.

Жергілікті прокурор Франсиско Моралес мәлімдегендей, трагедия себептерін анықтау үшін тергеу басталды. «Қолда бар мәліметтер бойынша, қоршаудың құлауынан қаза тапқан. Полиция көлігінің бұл оқиғаға қатысы бар-жоғы анықталып жатыр», — деді ол.

Чили полициясының генералы Алекс Баамондес құқық қорғау қызметкерлерінің біріне айып тағылғанын растады.

Оңтүстік Америка футбол конфедерациясы (КОНМЕБОЛ) қаза тапқандардың отбасына көңіл айтып, оқиғаны тәртіптік комитетке жібергенін мәлімдеді. Матч басталғанымен, кейін тоқтатылды.

Біздің парақшамыздан футбол матчтарының барлық нәтижелерін Live форматта бірінші болып біліңіз!