Ла Лига Президенті шамадан тыс жұмыс кестесіне байланысты ойыншылардың ереуілге шығу мүмкіндігіне таң қалмайды

ESPN мәліметінше, Ла Лига президенті Хавьер Тебас футболшылар матчтардың көбеюіне байланысты ереуілге шықса, бұл жағдайдың оны таң қалдырмайтынын айтты. Ол ойыншылардың алаңдаушылығын орынды деп сипаттады.

УЕФА клубтық турнирлерінің кеңеюі және жаңартылған ФИФА клубтық әлем чемпионаты осы маусымды клубтық футбол тарихындағы ең ұзақ маусымға айналдырды. Осыған байланысты Тебас былай деді:

«Иә, бұл мені таң қалдырмас еді, өйткені біз «жеткілікті» деп айту шегіне жеттік. Родри деңгейіндегі ойыншылардың осы мәселе туралы сөйлеп жатқанын және басқалардың оны қолдап отырғанын көргенде, менің тәжірибем мұндай жағдайға байыпты қарау керек екенін көрсетеді. Олай болмаса, сіз ереуілге тап болуыңыз мүмкін. Ойыншылардың кез-келген қызметкер сияқты ереуілге шығуға құқығы бар, бұл олардың еркін таңдауы.»

Ла Лига басшысы ойыншылар мен лигалардың ескертулерін тыңдау қажеттілігін атап өтіп, оларды «негізді» деп атады. Ол туындаған мәселені шешуге шақырды.

Премьер-Лиганың бапкерлері Пеп Гвардиола мен Микель Артета ойыншылардың шамадан тыс жүктемелеріне алаңдаушылық білдірсе, «Реал Мадрид» бапкері Карло Анчелотти матчтар санының өсуіне байланысты футболшылардың жалақыларын қысқартуға келісуі мүмкін деп болжады.

Тебас ФИФА-ның күнтізбе жасау тәсілін сынға алды:

«ФИФА күнтізбені ешкіммен кеңеспестен жасайды, олар ортақ шешімге келу туралы да ойланбайды. Біз кейбір жарыстарды қысқарту, кейбірін мүлдем алып тастау қажет деп санаймыз.»

Майамиде Ла Лига матчын өткізу мүмкіндігіне қатысты Тебас бұл жоспардың жүзеге асатынына сенім білдірді, бірақ нақты мерзімдері әлі белгісіз екенін айтты. Лига 2018 жылдан бері АҚШ-та тұрақты маусымдық матчтар өткізуге тырысып келеді, бірақ бұл Испания Корольдік футбол федерациясы, сондай-ақ АҚШ, УЕФА және КОНКАКАФ футбол ұйымдарының мақұлдауын қажет етеді.

«Біз маусымның үзіліс кезінде Майамиде матч өткізу мүмкіндігін іздейміз. Бұл біздің барғымыз келетін орын,» — деп қосты Тебас.

Осылайша, Ла Лига Испаниядан тыс тұрақты маусымдық матчтарды тек АҚШ-та өткізуді қарастыруда.