«Қызылжар» директоры өрттен кейінгі футбол орталығының жағдайы туралы айтты

«Қызылжар» футбол клубының директоры Николай Панин облыстық балалар-жасөспірімдер спорт мектебі аумағында болған өрттен кейін футбол орталығының жағдайы туралы баяндады, деп хабарлайды Meta-ratings.kz порталы.

Паниннің айтуынша, футбол орталығында 300-ден астам бала жаттығады. Киім-кешек пен жабдық мәселесі толық шешілген, барлық жас санатындағы тәрбиеленушілерге жаңа форма беріліп, 300 доп сатып алынған.

«Өрттен кейін жабық футбол манежінде жаттығу өткізуге байланысты қиындықтар туындады. Біз бұл мәселені шешуге тырысып жатырмыз. Жалақыға келсек, қаржыландыру жылдың басында емес, біраз уақыттан кейін келеді. Бұл бюджеттен қаржыландырылатын барлық спорт клубтарына тән стандартты тәжірибе. Жақын арада футболшылар, бапкерлер және клуб қызметкерлері екі айлық еңбекақысын алады», — деді Панин.

Сондай-ақ, ол «Қызылжардың» өткен жылдан бері жанкүйерлер мен көпшілікке ашық бола түскенін атап өтті. Маркетингтік іс-шаралар ұйымдастырылып, клубтың қызметі туралы ақпараттандыру жақсарды, демеушілер іздеу жұмыстары жүргізілуде.

Бұл бағыттағы жұмысты клубтың маркетологы Алмат Тұрсымбетов атқарады. Өзі де жанкүйер болған ол қазақстандық футболдың деңгейін көтеруді, клубтардың формасы еуропалық топ-чемпионаттардан кем болмауын армандаған.

«Ойынымызға арналған форма жанкүйерлер үйренген әдеттегі формалардан ерекшеленеді деп ойлаймын», — деп түйіндеді Панин.