КуПС Дастан Сатпаевты ерекше атап өтті

Финляндиялық КуПС клубының ресми сайты Чемпиондар лигасының 2025/26 жылғы іріктеу кезеңіндегі «Қайратқа» қарсы ойын алдында алматылық команданың шабуылшысы Дастан Сатпаевты ерекше атап өтті.

«Қайрат» сапындағы ең көзге түскен ойыншы – 16 жастағы сенсациялық жас футболшы Дастан Сатпаев. Ол жақында «Челси» клубымен келісімшартқа қол қойды. Өткен маусымнан бері ол Қазақстан лигасындағы үздік ойыншылардың бірі саналады. Уақыт өте келе нағыз жұлдызға айнала ма – оны алдағы уақыт көрсетеді», – делінген КуПС баспасөз қызметінің хабарламасында.

Биылғы маусымда Сатпаев негізгі құрамда 19 ойын өткізіп, 9 гол соғып, 5 нәтижелі пас берген. Ақпанда ол «Қайраттың» Қазақстан Суперкубогын жеңіп алуына үлес қосқан еді.

«Қайрат» пен КуПС арасындағы алғашқы матч 22 шілде күні Финляндияның Куопио қаласында өтеді. Кездесудің басталуы – Астана уақытымен 20:00-де. Қайта жауап ойыны 29 шілдеде Алматыда өтеді.

Айта кетейік, бұған дейін Сатпаевтың Чемпиондар лигасы іріктеуіндегі «Олимпияға» қарсы алғашқы голы Франция мен Словения басылымдарында да жазылған болатын.