Кучеров голсыз қалды, «Тампа-Бэй» қатарынан үшінші жыл ерте қоштасты

НХЛ-дің негізгі біріншілігін ұпай саны бойынша көш бастап аяқтаған Никита Кучеров плей-офф кезеңінде өз ойынын қайталай алмады. Ресейлік шабуылшы «Флорида Пантерзге» қарсы серияда бірде-бір гол соға алмай, командасы алғашқы раундта жарыс жолынан шығып қалды.

Серияның бесінші және шешуші матчында Кучеров мұз айдынында 23 минуттан астам уақыт өткізді, оның ішінде бес минуты көпшілік құрамда болды. Алайда бұл көрсеткіштер нәтижеге әсер ете алған жоқ — шабуылшы матчты пайдалылық көрсеткіші –2 болып аяқтады.

Стэнли Кубогының осы кезеңінде Кучеров тек төрт нәтижелі пас беріп, голсыз қалды. Пайдалылық көрсеткіші серия бойы нөлде сақталды. Ал «Тампа-Бэй Лайтнинг» «Флорида Пантерзге» 1:4 есебімен жол беріп, қатарынан үшінші жыл плей-оффтың бастапқы кезеңінде сүрінді.

Айта кетейік, Кучеров негізгі маусымда 78 ойында 121 ұпай жинап (гол+пас), лиганың ең нәтижелі ойыншысы атанған болатын. Бірақ бұл көрсеткіш плей-оффта «Тампаға» көмектесе алмады.