«Кристал Пэлас» — Англия Кубогының 2024/25 жылғы жеңімпазы

«Уэмбли» стадионында өткен Англия Кубогының финалында «Кристал Пэлас» сенсациялық жеңіске жетті. Лондондық клуб өз тарихында алғаш рет турнир трофейін жеңіп алып, «Манчестер Ситиді» 1:0 есебімен ұтты.

Матчтың жалғыз голын 16-минутта Эберечи Эзе соқты — жартылай қорғаушы команда шабуылын дәл соққымен аяқтады.

24-минутта Пэлас қақпашысы Дин Хендерсон Эрлинг Холандқа қарсы айып алаңынан тыс жерде қолмен ойнады, алайда төреші бұзушылықты елеусіз қалдырды.

35-минутта «Сити» есепті теңестіруге нақты мүмкіндік алды, бірақ Омар Мармуштың пенальтисін Хендерсон қайтара білді.

Екінші таймда Даниэль Муньос «Сити» қақпасына гол соқты, бірақ офсайд тіркеліп, ВАР шешімімен гол есепке алынбады.

Осылайша, «Кристал Пэлас» клуб тарихындағы алғашқы Англия Кубогын жеңіп алды, ал «Сити» маусымды маңызды титулсыз аяқтады.