Конор Макгрегор қолғапсыз жұдырықты жекпе-жектерге қызығушылық танытты

Италияда өткен баспасөз мәслихатында танымал ирландиялық жауынгер Конор Макгрегор күтпеген мәлімдеме жасады. UFC-дің екі салмақ дәрежесіндегі бұрынғы чемпионы өзінің қолғапсыз жұдырықты жекпе-жекке қатысуға ниеті бар екенін мәлімдеді.

«Конор Макгрегор Bare Knuckle лигасында төбелеседі, менің сөзімді есте сақтаңыздар», — деді Макгрегор сенімді түрде.

Ирландиялық спортшының бұл мәлімдемесі жанкүйерлер арасында үлкен қызығушылық тудырды. Сонымен қатар, Макгрегор аңызға айналған ресейлік ММА жауынгері Федор Емельяненкоға меңзеп: «Сәлем, Федор — біз күтудеміз» деп әзілдей отырып, оның BKFC лигасына қатысуы мүмкін екенін меңзеді.

Қазіргі уақытта Макгрегордың Bare Knuckle жекпе-жегіне қатысатыны туралы нақты келісім туралы хабарланған жоқ. Алайда, бұл мәлімдеме оның алдағы жоспарлары туралы талқылаулар мен болжамдарды күшейтіп отыр.