Конор Брэдли: «Солтүстік Ирландияны әлем чемпионатына шығарғым келеді»

«Ливерпуль» қорғаушысы Конор Брэдли Солтүстік Ирландия құрамасын әлем чемпионатына апару — бала күнгі арманы екенін айтты. 21 жастағы футболшы қазіргі таңда Англия Премьер-лигасында тұрақты ойын көрсетіп, ұлттық құраманың да негізгі ойыншысына айналды.

«Бұл әрбір футболшының арманы. Біз үшін бұл қаншалықты қиын екенін түсінеміз — мұндай жетістік Солтүстік Ирландия тарихында санаулы ғана рет болған. Бірақ соны ерекше ететіні де — осы. Бір күні сол арманға жетеміз деп сенемін», — деді Брэдли.

Майкл О’Нил баптайтын құрама тәжірибелі ойыншылар — Стивен Дэвис, Стюарт Даллас пен Джонни Эванс кеткеннен кейін жас буынға сенім артуда. Қазіргі уақытта Брэдлимен қатар Шей Чарльз, Исаак Прайс және Трай Хьюм секілді жаңа есімдер алдыңғы қатарға шықты.

Брэдли Ұлттар лигасындағы кейбір ойындарда капитандық міндет атқарған. Ол ұлттық құраманың көшбасшысы ретінде жауапкершілікке дайын екенін бірнеше мәрте дәлелдеп үлгерді.