ҚФФ Тәртіптік комитеті Қазақстан чемпионатының 21-ші турының қорытындысы бойынша шешім шығарды

2024 жылғы 27 қыркүйекте Қазақстан футбол федерациясының (ҚФФ) Бақылау, тәртіптік және этикалық комитетінің отырысы өтті. ҚФФ ресми сайтының хабарлауынша (KFF.kz) , ел чемпионатының 21-турында орын алған бірқатар қақтығыстарға байланысты бірнеше шешім қабылданды.

«Ордабасы» — «Астана» матчы
«Ордабасы» футбол клубы жанкүйерлердің төрешілерге қарсы қорлайтын айқай-шулары үшін 100 АЕК (369 200 теңге) көлемінде айыппұл төлеуге міндеттелді. Айыппұлды төлеу мерзімі 2024 жылдың 26 қазанына дейін белгіленді.
«Астана» футбол клубының бас бапкері Григорий Бабаянға матч кезінде команданың ресми тұлғаларының арнайы орындарда болу ережесін бұзғаны үшін ескерту жасалды.

«Тұран» — «Қызылжар» матчы
«Тұран» футбол клубы жанкүйерлердің бас төрешіге айтқан балағат сөздері үшін де 100 АЕК (369 200 теңге) көлемінде айыппұл алды. Олар да бұл соманы 2024 жылдың 26 қазанына дейін төлеуі керек.
«Қызылжар» футбол клубының ойыншылары матчтан кейін киім ауыстыратын бөлмеге кіргенде қабырға мен пластикалық тақтайшаға зақым келтіргені үшін ескерту алды. Оларға «Тұран» футбол клубына келтірілген залалды өтеу міндеттелді.

Федерацияның хабарлауынша, бұл шаралар ҚФФ-ның тәртіптік регламенті мен 2024 жылғы чемпионаттың регламенті негізінде қабылданды. Олар қазақстандық футболдағы тәртіп пен спорттық рухты сақтау, сондай-ақ болашақта осындай оқиғалардың алдын алу мақсатында енгізілді.