Қазақстандық шабуылшы Португалияда мансабын жалғастыруы мүмкін

Португалияның «Боавишта» клубы «Тобол» шабуылшысы Ислам Чесноковты жалға алып, кейін сатып алу құқығымен келісімшарт жасасуға ниетті екенін хабарлады. Бұл туралы Prosports.kz Legalbet.kz порталына сілтеме жасап мәлімдеді.

Португалиялық клуб қостанайлықтарға ойыншыны жалға алу және кейін 450 мың еуроға сатып алу мүмкіндігін ұсынды.

25 жастағы Ислам Чесноков «Тобол» сапында 2023 жылдың ақпан айынан бері ойнап келеді. Оның клубпен келісімшарты 2025 жылдың 31 қазанына дейін жарамды.

Transfermarkt мәліметі бойынша, футболшының нарықтық құны 800 мың еуроны құрайды.

Ал «Боавишта» клубына келер болсақ, олар Примейраның қазіргі маусымында 18 турдан кейін небәрі 12 ұпай жинап, турнирлік кестенің 18-орнында тұр.

Бұл трансфер Чесноковқа мансабында жаңа қадам жасауға мүмкіндік бере ала ма?