Қазақстандық Құламбаева Сербиядағы ITF жұптық турнирінің финалында жеңілді

Жібек Құламбаева британдық теннисші Фрея Кристимен бірге Сербияның Куршумлия-Бане қаласындағы ITF турнирінде жеңіске жете алмады.

Финалдық кездесуде қазақстандық-британдық жұп турнирдің төртінші нөмірлі жұбы — түркиялық Айла Аксу мен чехиялық Анна Сисковамен кездесті. 69 минутқа созылған матч қарсыластардың 6:4, 6:2 есебімен жеңісімен аяқталды.

WTA рейтингінде 337-орында тұрған Жібек Құламбаева бұл турнирде жекелей сында да өнер көрсетті — жартылай финалда ол ресейлік Алина Чараевадан (242) үш сетте жеңілді: 6:4, 4:6, 1:6.