Қазақстандық боксшы Ахмедов Hollywood Fight Nights шоуында басты жекпе жекке дайындалуда

Қазақстандық боксшы Садриддин Ахмедов (14-0, 12 KO) 13 желтоқсанда Калифорния штатының Санта-Инез қаласында өтетін Hollywood Fight Nights шоуында басты жекпе-жекке шығуға дайындалуда. Оның қарсыласы америкалық боксшы Рафаэль Игбокве (17-5, 7 KO) болады. Бұл жекпе-жек Ахмедовтың 360 Promotions қолдауымен Америкадағы екінші кездесуі болмақ. Оның АҚШ-тағы дебюті 31 тамызда Санта-Инездегі сол рингте Антонио Тоддты (17-11, 9 KO) бірінші раундта нокаутпен жеңуімен есте қалды.

Промоутер Том Леффлер Ахмедовтың өнерін жоғары бағалап, оның алғашқы жеңісі шеберліктің жоғары деңгейін көрсеткенін айтты. Алдағы жекпе-жекте Садриддин бұрын Сергей Богачук пен Израиль Мадримов сияқты тәжірибелі боксшылармен кездескен Игбоквеге қарсы тұрып, үлкен сынақтан өтпек.

Айта кету керек, Садриддин Ахмедов әуесқой бокста бай тәжірибе жинақтап, Қазақстан ұлттық құрамасында көптеген жетістіктерге жеткен. Кәсіпқой рингте мансабын жалғастыра отырып, ол енді америкалық жанкүйерлерді бағындыруға және әлемдік бокс элитасына жол тартуға ниеттеніп отыр.